𝐅𝐎𝐑𝐌𝐀𝐒𝐀𝐔𝐍 𝐒𝐈𝐒𝐓𝐄𝐌𝐀 𝐁𝐀𝐒𝐄 𝐃𝐀𝐃𝐔𝐒 𝐄𝐍𝐒𝐈𝐍𝐔 𝐒𝐔𝐏𝐄𝐑𝐈𝐎𝐑 𝐓𝐈𝐌𝐎𝐑-𝐋𝐄𝐒𝐓𝐄 𝐅𝐀𝐒𝐄 𝐈𝐈𝐈

Díli, 22/04/2024: Diresaun Nasional Siénsia no Teknolojia (DNCT), Ministériu Ensinu Supérior, Siénsia no Kultura, kontinua realiza formasaun Faze da-Tolu konaba Utilizasaun Sistema Base Dadus Ensinu Superior Iha Timor- Leste, ba Instituisaun Ensinu Superior haat (4) hanesan, ICS, JSI, UNITAL no UNDIL iha salaun INCT, Balide Díli.

Atividade ne’e ho nia objetivu jeral atu hodi simplifika no optimiza jestaun administrativa no akademiku inklui sentralizasaun dadus ba Instituisaun Ensinu Supérior sira hotu iha território nasional Timor-Leste nian, hodi bele garantia kredibilidade, efisiensia no efikasia husi dadus sira ne’e nian.

Diresaun Nasional Siénsia no Teknolojia (DNCT), hanesan divisaun ida ne’ebé maka existe iha Ministériu Ensinu Superior, Siensia no Kultura, tuir Dekretu Lei No. 56 /2023, 6 Setembru, artigu 16, ne’ebé ho nia kompensia ida atu hodi halo mos Sistematizzasaun no padroniza prosedimentus operasional no kontrolu internu Ministériu nian, liu-liu ba sistematizasaun no unifikasaun dadus hotu Ensinu Supérior nian, ligadu ho numerus graduasaun, estudante no dosente sira.

Antes ne’e, iha fase anterior DNCT realiza ona formasaun hanesan ba Instituisaun Ensinu Supérior ne’en (6), no iha Fase kontinuasaun ida ne’e, realiza ba iha Instituisaun Ensinu Supérior Ha’at (4) hanesan, ICS, JSI, UNITAL no UNDIL.

Atividade formasaun ida ne’e, loke ofisialmente husi Diretora Jeral Ensinu Supérior no Siénsia, Sra. Maria Filomena Lay Guterres, no hetan partisipasaun husi, representante akademikus sira no mos teknikus sira husi Ministériu rasik.

Formador atividade ida ne’e rasik, mai husi desenvolvedor sistema base dadus Ensinu Supérior nian rasik, no tuir planu atividade refere sei halao durante loron lima (5) nia laran, hahu husi loron Segunda-Feira, 22 Abril no sei termina iha loron Sexta-Feira, 26 Abril 2024, iha fatin hanesan.