“𝐄𝐃𝐔𝐊𝐀𝐒𝐀𝐔𝐍 𝐊𝐔𝐀𝐋𝐈𝐃𝐀𝐃𝐄 𝐌𝐀𝐊𝐀 𝐗𝐀𝐕𝐄 𝐁𝐀 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔”

DILI, 11 Jullu 2023– S. E. Ministru Edukasaun Superiór, Siénsia no Kultura, 𝐃𝐫. 𝐉𝐨𝐬é 𝐇𝐨𝐧ó𝐫𝐢𝐨 𝐝𝐚 𝐂𝐨𝐬𝐭𝐚 𝐏𝐞𝐫𝐞𝐢𝐫𝐚 𝐉𝐞𝐫ó𝐧𝐢𝐦𝐨, partisipa iha serimónia toma pose ba Pró-Reitór no Diretór foun sira iha Universidade Nasionál Timor Lorosa’e (UNTL).

Iha serimónia tomada pose ida ne’e, S.E Ministru hato’o saudasaun espesiál, liuliu ba Magnifiku Reitór UNTL, 𝐏𝐫𝐨𝐟𝐞𝐬ó𝐫 𝐃𝐨𝐮𝐭𝐨𝐫 𝐉𝐨ã𝐨 𝐌𝐚𝐫𝐭𝐢𝐧𝐬, no agradese ba konvite hodi partisipa eventu ne’e.

Nune’e mos, Sr. Ministru Geronimo hato’o parabéns no votus ho susesu barak liubá Pró-Reitór foun no Diretór sira hosi Sentru Universidade Nasionál Timor Lorosa’e (UNTL), ne’ebé simu pose ba kna’ar foun.

Sr. Ministru Jerónimo, iha nia diskursu haktuir katak edukasaun ne’ebé kualidade maka xave ba dezenvolvimentu sustentável no fortalesimentu ba kualkér nasaun.

Universidade Públiku (UNTL) iha papél importante no tenke sai nu’udar referénsia ka modelu iha nível kualidade ensinu no preparasaun ba ninia graduadu sira iha merkadu-traballu.

“Tan ne’e, dirijente sira, liuliu, Pró-Reitor, Vise-Reitór, Dekanu no Diretór sira, liu hosi lideransa Magnifiku Reitór, ita-boot sira iha papél importante tebes atu dezenvolve no hatudu esforsu makaas hodi promove kultura ba kolaborasaun no reforsu parseria hosi UNTL ho instituisaun sira ensinu superiór, organizasuan governamentál sira no setór privadu,” nia subliña.

Iha okaziaun hanesan, Sr. Ministru mos haktuir katak Governu Konstitusional IX (dasiak) prevee ona iha ninia programa, atu kria kondisaun no reforsa liután kualidade ensinu iha UNTL, inklui mós kapasita rekursu umanu sira, hadi’a kondisaun infraestrutura no ekipamentu.

Tan ne’e, UNTL sei presiza nafatin iha koordenasaun no kooperasaun di’ak ho Ministériu Edukasaun Superiór, Siénsia no Kultura, atu nune’e, hamutuk ita bele atinji meta sira ne’ebé ita propoin ona, no transforma UNTL sai nu’udar reférensia akadémika ba instituisaun sira seluk iha Timor-Leste ho rekoñesimentu internasionál.

𝐌é𝐝𝐢𝐚 𝐌𝐄𝐒𝐒𝐊