𝐒𝐄𝐌𝐈𝐍Á𝐑𝐈𝐔 𝐈𝐍T𝐄𝐑𝐍𝐀𝐒𝐈𝐎𝐍Á𝐋 𝐒𝐍𝐐-𝐓𝐋 𝟐𝟎𝟐𝟒

Díli, 11/07/2024: Ministériu Ensinu Superiór, Siénsia no Kultura, liuhusi Diresaun Jeral Ensinu Superiór no Siénsia hamutuk ho Komisaun Koordenadora Universidade no Intitutu (CUIS – Sigla Portugués), realiza Semináriu Internasional kona-ba Sistema Kualifikasaun Nasional Timor-Leste (SNQ-TL) ho tema “Dezenvolvimentu no Validasaun Padraun Kompeténsia husi SNQ-TL”, iha Otél Novo Turismu Díli, durante loron rua (2) nia laran, hahu husi loron 11 to’o 12 Jullu 2024.

Objetivu husi Semináriu ida ne’e, atu diskute, dezenvolve no halo validasaun ba iha Padraun Kompetensia husi Sistema Nasional Kualifikasaun Timor-Leste nian, ne’ebé maka dezenvolve no identifika ona husi komisaun revisaun iha Fase hirak liu ba. Komisaun traballu ne’ebé mak responsável ba halo revisaun ida ne’e, hafahe ba iha setor rua ne’ebé mak, hanesan: Setor Akademiku no setor Tékniku Vokasional nian, ho nia prinsipal prioridade atu hodi hare ba nível kualifikasaun no dominiu iha aprendizajem nian, ne’ebé mak ho nia desizaun, reduz nível kualifikasaun husi Nivel 10 ba iha Nivel 8, no simplifika dominiu aprendizajem ba iha dominiu 3: (1. Koñesimentu, 2. Kompeténsia, 3. Autonomia no Responsabilidade).

Orador Nasional no Internasional sira ne’ebé mak hola parte iha semináriu ida ne’e, mai husi experientes no Instituisaun relevantes sira ne’ebé maka, foka ba iha area kapasitasaun rekursu Umanu nian, no dezenvolvimentu ba sistema integradu sira ne’ebé mak ligadu ho kapasitasaun rekursu umanu ho nia aliñamentu saida final ba iha nesessidade merkadu no kampu traballu nian.

Abertura ba iha sesaun ida ne’e ho palestra husi S. Exa. Primeiru-Ministru, Kay Rala Xanana Gusmão, iha loron dahuluk Semináriu nian (11 Jullu 2024), afirma katak “importánsia hosi formasaun no kapasitasaun rekursu umanu, no produsaun abilidade ba susesu polítika ekonómika nasionál”. Universidade sira atu kumpri misaun prepara futuru jerasaun hodi kaer rai ida-ne’e. Husu mós ba Universidade sira, ANAAA no instituisaun relevante sira atu kontinua hadi’a intervensaun sira, para sistema edukativu hosi ensinu báziku to’o ensinu superiór bele kumpri papel ida-ne’e, tanba edukasaun la’ós servisu ida deit, maibé hanesan vokasaun no/ka misaun atu serbí no kuida.

Semináriu refere termina iha loron 12 Jullu 2024, ho Sesaun diskusaun no Validasaun ba iha deskritores kompetensia sira ne’ebé mak defini ona iha Nivel 8, Sistema kualifikasaun Nasional Timor-Leste husi Komisaun Traballu sira. Sesaun diskusaun refere hafahe ba iha grupu 2, ne’ebé mak komportu husi Grupu Ensinu Supérior no Grupu TVET (technical and vocational education and training).

Hola parte iha sesaun ida ne’e, S. Exa. Ministru Ensinu Superiór, Siénsia no Kultura, Dr. José Honório, akompãnadu husi kargus dirijentes no teknikus sira husi MESSK, hamutuk ho partisipantes husi Instituisaun sira hanesan, INDMO, ANAAA, SEFOPE, CCI-TL, Magnifikus Reitores/Prezidente husi Instituisaun Ensinu Superiór sira, no mos Instituisaun relevantes sira seluk.