by Dili, 17-01-2025: Ministériu Ensinu Superiór, Siénsia no Kultura (MESSK), liu husi Diresaun Nasionál Finansas, Planeamentu no Orsamentu (DNPFO), hala’o sorumutuk dahuluk kona-ba Planu Ezekusaun Orsamentu ba tinan 2025 ho partisipasaun husi Xefe Gabinete, Diretór-Jerál, Inspetór, Diretór Nasionál ka ekiparadu, Xefe Departamentu, Pontu Fokál Finansas sira husi kada Diresaun no Unidade no mós Asesór Nasionál no Internasionál.
Enkontru ne’e lidera husi S. Exa. Ministru Ensinu Superiór, Siénsia no Kultura, Dr. José Honório, ho objetivu prinsipál atu hato’o informasaun no orientasaun ba Dirijenti sira kona-ba prosedimentu ka mekanismu ezekusaun Orsamentu Jerál do Estadu (OJE) ba tinan 2025.
S. Exa. Ministru, iha ninia intervensaun hato’o katak ezekusaun orsamentu iha tinan 2024 lao ho diak tebes, haree ba persentajen ne’ebé atinji ona. Maibé, saleinta katak presiza atu haree ninia kualidade. Tanba ne’e, S. Exa. Ministru apela ba kargu Xefia sira atu servisu ho seriedade no ezekuta orsamentu ne’e tuir Dekretu-Lei ezekusaun ne’ebé vigora ona atu nune’e asegura ezekusaun tuir prosedimentu ne’ebé iha.
Iha parte seluk, Diretór-Jerál Planeamentu no Finansas, Sr. Hernani Viterbo da Costa Soares, hato’o katak ezekusaun OJE ba Unidade Orgánika sira tenki la’o tuir Dekretu-Lei n.º43/2024, loron 20 Fulan Dezembru, kona-ba Ezekusaun Orsamentu Jeral do Estadu (OJE) 2025, no mos tuir Sirkulár ne’ebé Ministériu Finansas haruka ba liña ministeriál tomak.
Diretór-Jerál apela mos ba Dirijenti no Pontu Fokál Finansas sira iha kada Diresaun atu elabora Planu Orsamentál no Planu Aprovizionamentu ba tinan 2025 nian, tamba tuir regras Servisu no Entidade sira husi Estadu presiza submete Planu Ezekusaun Orsamentál ba Diresaun-Jerál Tezouro Ministério Finansas to’o loron 31 fulan janeiru 2025.
English