by 
Dili, 23/07/2024: Ministériu Ensinu Superiór, Siénsia no Kultura, realiza serimónia tomada de posse ba iha kargus dirijentes foun Ministériu nian, iha Salaun Delta Nova, Díli, ho total hamutuk nain 32, ne’ebé mak kompostu husi feto nain 10 no mane 22, ne’ebé mak empossa ba pozisaun kargus hanesan, Diretor Jeral, Inspetor Jeral ba Gabinete Inspesaun no Auditoria, Koordenador Unidade, Dirijentes ba Diresaun no Xefi departamentu sira.
Serimonia tomada de posse ida ne’e, realiza base-ia ba desizaun husi Komissaun Funsaun Publika ho No. 6296/2024/CFP, ne’ebé mak assinadu husi Prezidente Komissaun Funsaun Publika, Sr. Agostinho Letêncio de Deus, iha loron 28 Juñu 2024, kona-ba, Rekrutamentu, Nomeasaun no Promosaun iha setor Publiku, ne’ebé definitivamente ba MInistériu Ensinu Superiór, Siénsia no Kultura, ho total kargus xefias hamutuk 32.
Iha Sesaun ida ne’e, prezidente Komissaun Funsaun Publika, Sr. Agostinho Letêncio de Deus, iha nia intervensaun afirma katak ´´ Kargu ne’ebé Mak dirijentes sira asumi tenki iha komitmentu katak hala’o sira nia knar ho responsabilidade no loialidade, bazeia ba Termu aseitasaun nebe Mak Sira hetan“.
Aleinde ne’e, iha S. Exa. Ministru Ensinu Superiór, Siénsia no Kultura, Dr. José Honório, mos afirma iha nia diskursu, hodi husu ba dirijentes emposadus sira, tenki serbi ho loialidade hodi hatudu imajem hanesan funsionariu ne’ebé mak prontu serbi ba estadu no liu-liu iha IX Governu Konstitusional.
Hola parte iha sesaun ida ne’e, S. Exa. Ministru Ensinu Superiór, Siénsia no Kultura, Dr. José Honório, hamutuk ho Prezidente Komissaun Funsaun Publika, Sr. Agostinho Letêncio de Deus, Diretor Ezekutivu ANAAA, Sr. Nilton Paiva, kargus dirijentes no teknikus sira husi MESSK rasik, reprezentantes Familias no mos Instituisaun relevantes sira ne’ebé mak presente mos iha serimonia ofisial refere.
