Biografia Sekretáriu Estadu Arte no Kultura
Teófilo Caldas Moris iha Suku Fatu-Bessi, posto administrativu Hatolia, munisípiu Ermera, iha loron 7 fulan Marsu tinan 1973, husi aman Domingos Caldas da Silva no inan Alice do Rosário Brites. Oan daruak husi alin hamutuk nain 10, mane nain 8 no nain feto 2. Hahú tama eskola primária n.º 33 Fatu-Bessi iha 1982, kontinua ba eskola pre-sekundária Gleno iha 1987 no remata eskola sekundária 17 Gleno, Ermera, iha 1992 no agora dadaun kontinua hela estudu iha Universidade Nacional Timor-Lorosa’e (UNTL).
Kaben ho Levenita Madeira, iha oan hamutuk nain 5, mane nain 4 no feto nain 1 maka hanesan oan dahuluk Telizano Madeira Carvalho, tinan 23 finalista Universidade Kediri – Indonesia, oan daruak Moises Teófilo Caldas da Silva tinan 21 eskola iha Universidade hanesan ho nia maun semester IV, oan datoluk Toty Jezito Caldas tinan 19 kontinua mos eskola hamutuk nia nia maun nain rua iha universidade ne’ebé hanesan foin maka komesa, oan ba dahaat Cristiano Alexandre Teófilo Caldas tinan 11 agora dadaun eskola iha eskola primária n.º 02 Bebonuk no oan ida ikus maka Nossa Beatriz C.L.M Caldas foin maka halo fulan 8.
Teófilo Caldas hanesan mos timor-oan sira seluk ne’ebé sofre barak ba konsekuénsia funu ba ukun rasik an iha faze invazaun no okupasaun Repúblika Indonésia, husi 1975-1980 hamutuk ho família halai iha ailaran, ikus mai inimigu forsa Indonésia kaptura iha Sare Asulau iha 1980 no destera ba Rairobo Atabae, 1981 fila fali mai Fatu-Bessi. Iha faze re-organizasaun luta nian husi 1987-1998 ativu iha frente klandestina grupu Maubere submete ba responsável padre Mario Belo iha komandu CNRM nia okos. Husi 1998-1999 nafatin frente klandestina kargu hanesan seksaun téknika submete ba Komandante Nino Konis Santana iha komandu CNRT nia okos, husi partisipasaun ne’e ikus mai hetan rekoñesimentu no valorizasaun hosi estadu ho pensaun subsisténsia ba kategoria 8 a 14 anos ba partisipasaun luta ba ukun rasik an nian.
Kona-ba esperiénsia servisu ho instituisaun seluk aman ba oan nain 5 ne’e hahú hanesan Funsionáriu ETADEP husi 1993-1998, tempu ukun an sai funsionáriu Ministériu Interior husi 2002-2006 no husi 2007-2017 moris ho vida hanesan emprezáriu. Partisipa mos iha formasaun profisionál sira hanesan formasaun iha área lideransa iha Ministériu Interiór iha tinan 2005 no halo estudu komparativu iha Yayasan Satunama Yogyakarta iha tinan 2017.
Iha vida politika depois de ukun rasik an bainhira partidu CNRT moris iha 2007 sai ekipa susesu ba partidu CNRT, iha 2012 eleitu ba estrutura partidu CNRT ho pozisaun hanesan 1º Vice Kordenadór partidu CNRT postu administrativu Dom-Aleixo no asume mos kna’ar hanesan membru Konsellu Diretivu Nasionál partidu CNRT.
Hafoin Aliansa Mudansa ba Progresu (AMP) manan iha eleisaun antesipada iha loron 12 fulan Maiu iha tinan 2018, hetan fiar nu’udar membru VIII Governu Konstitusionál kaer pasta hanesan Sekretáriu Estadu Arte no Kultura ba períodu 2018-2023 tutela ba Ministériu Ensinu Superiór, Siénsia no Kultura.