Programa Bolsa Estudu  Ministério do Ensino Superior, Ciência e Cultura (MESCC)Timor-Leste Tinan Akadémiku 2025/2026

Ministério do Ensino Superior, Ciência e Cultura (MESCC) Timor-Leste, hahú loke programa bolsa estudu ba Tinan Akadémiku 2025/2026, nível  Mestradu ho vaga 5 iha area Business Administration (Entrepreneurship Master by Research) vaga rua (2), Business Administration Master by Research vaga rua (2), Management (Specialization in Tourism Master by Research) vaga ida (1) iha University of Kuala Lumpur(UniKL) – Malaysia.

A. Kriteria Aplikasaun

KRITERIA JERAL

1. Tenki sidadaun Timorense
2. Tenki iha kondisaun saúde (mentál no fíziku) ne’ebé permite atu halo estudu iha rai li’ur
3. La iha rejistu ba kazu kriminál ka ezekusaun sivíl husi tribunál kontra kandidatu
4. Seidauk hetan bolsa husi governu Timor-Leste ka parseiru nasaun seluk (iha momentu mai aplika bolsa ida ne’e)
5. Kandidatu ba programa: Nível Mestradu ne’e ho idade 45 mai kraik, remata ona lisensiatura

Kritériu Espesífiku:

 – Iha síkulu estudu Mestradu nian:

• Portador diploma lisensiatura ka ekivalénsia, aneksa ho transkirsaun notas no certidão de habilitação legalizado;
• Tenki iha koñesimentu Jerál adekadu ho área ne’ebé hili ba espesializasaun iha Mestradu nian.
• Tenki domina lian Ingles iha nível ko’alia, hakerek no rona ho diak;
• no Iha valór médiu mínimu 2,75 ba eskola iha Universidade Kuala Lumpur- Malasia consideravelmente equivalente História Escolar ka Trankrisaun Valór ikus programa Licensiatura;
• Ba kandidatu portador diploma lisensiatura ka equivalente ne’ebé mak eis bolseiru Estadu no servisu ona iha Administrasaun Públika Estadu no mos Setór Privadu tenki hetan rekomendasaun husi superior hierárkiku fatin servisu nian atu bele konkore ba vaga Mestradu;
• Ba kandidatu ne’ebé nu’udár funsionáriu permanente Estadu nian, presiza hetan rekomendasaun husi superior hierárkiku atu bele konkore ba bolsa ida ne’e;

B. Sei Labele Aplika ba Bolsa nee no Labele Sai Bolseiru, bainhira:

1. Ema ne’ebé iha ona diploma husi estabelesimentu ensinu superiór hanesan iha nível Diploma Lisensiatura iha área seluk ne’ebé la koresponde ho kursu ne’ebé mak oferese;
2. Ema ne’ebé Eis Bolseiru, uluk estuda iha rai li’ur tuir programa Governu Timor-Leste rasik ka parceria Timor-Leste ho rai seluk maibé La susesu no lakon bolsa;
3. Ema ne’ebé mak eis bolseiru susesu iha programa bolsa estudu Governu Timor-Leste nian rasik ka parceria ho rai seluk, hetan esperiénsia servisu iha Administrasaun Públika maibé la hetan rekomendasaun husi superior hierárquico iha fatin servisu ba Administrasaun Públika nian;
4. Funsionáriu permanente Estadu nian ne’ebé la hetan rekomendasaun husi superior hierárkiku;
5. Timor-oan ne’ebé mak hetan pena iha kazu civil ka kriminal tuir akordaun Tribunal nian ka hetan aplikasaun TIR;
6. Ema ne’ebé hetan moras HIV/SIDA, TBC, ASMA, EPILEPSIA, moras sira ne’ebé facilmente transmissível no, conforme esperiénsia comum médiku nian, gravemente prejudika desempeñu estudante ida nian iha prosesu estudu;
7. Timor-oan ne’ebé hetan espulsaun eh deportasaun husi Nasaun ruma bazeia razaun saída deit;
8. Ema ne’ebé hetan ona demisaun husi Komisaun Funsaun Públika.

C. DOKUMENTU APLIKASAUN

Dokumentu obrigatóriu ne’ebé tenki submete iha períodu kandidatura nian mak hanesan tuir mai ne’e:

1. Formuláriu aplikasaun kompletu tuir aprovasaun husi servisu Ministériu Ensinu Superior, Siênsia no Kultura-MESSK responsável ba bolsa estudu  
2. Fotokópia Diploma no Transkrisaun Akademika, akompaña ho tradusaun iha lian Ingléz (tenki legalizadu orijinál husi MESCC ne’ebé hetan ona akreditasaun)
3. Fotokópia Passaporte Valido (karik iha ona); bain hira liu ona bolsa presija Notariadu husi Ministériu Justisa
4. Sertidaun Moris RDTL no Bilete Identidade; Tradusaun iha lian Ingles bain hira liu  bolsa presija Notariadu husi Ministériu Justisa
5. Kartaun Elitoral no Bilete Identidade Kandidatu nian
6. Boletim de Registu Kriminal; no Tradusaun iha lian Ingles, bain hira liu ona bolsa presija Notariadu husi Ministériu Justisa
7. Deklarasaun komprimisiu kandidatura nian katak la ativu bolsa ka manan ona vaga bolsa estudu ruma husi parseiru ruma no devidamente kandidatu rasik mak asina; Tradusaun iha lian Ingles
8. Fotokópia Sertifikadu kualifikasaun iha lian no lian Ingléz IELTS ka TEOFL ka ekivalente (tenke validu)
9. Curriculum vitae asina no testamuña husi ema nain rua (Assinatura original kandidatu no testamuña); Uja lian Ingles
10. Atestadu Mediku husi HNGV ka Hospital Referal (aneksa ho nia resultadu analisa);Tradusaun iha lian Ingles; bain hira liu  bolsa mak submete
11. Karta Rekomendasaun husi Supervizór fatin serbisu nian (Assinatura no karimbo original); Uja lian Ingles;
12. Esbosu proposta planu peskija nian, Numeru pagina livre; Tipo Letra Time New Roman ; Tomanho 12 ba konteudu; Tomanho 14 ba Titlu no Subtitlu; Espaçu 2; Uja lian Ingles;

D. Prosesu Kandidatura

1. Formuláriu Aplikasaun bele hanehan iha Link ne’e ( https://mescc.gov.tl/wp-content/uploads/2025/04/FORMULARIU-BOLSA-ESTUDU-Abril-2025.pdf ) ka bele mai foti iha Unidade Parserias no Kooperasaun-UPC liu husi Ministério do Ensino Superior, Ciência e Cultura (MESCC),
2. Informasaun klaru bele mai diretamente iha UPC-MESCC,  Avenida Marginal no. 4 Colmera – Dili, Timor-Leste, iha oras serbisu nian no bele mos kontaktu ba Sra. Irene da Costa ho Nu. +67077988198 ou Sra. Nelia Gomes da Costa ho Nu. +670 77066882
3. Kalendáriu Prosesu Kandidatura ba Universidade Kuala Lumpur;

• Dia 24 – 5 Maiu 2025 :Anúnsiu públiku no Prense Furmulariu husi online
• Dia 8-15 Maiu  2025 : Devolve formuláriu aplikasaun nian no Selesaun dokumentu
• Dia 17 Maiu 2025 : Anúnsiu Resultadu Selesaun Dokumentu
• Dia 21-23 Maiu 2025 : lntervista
• Dia 26-27 Maiu 2025 : Anunsiu rezultadu finál ba kandidatu ne’ebé passa intervista.

NB. Ministério do Ensino Superior, Ciência e Cultura sei notifika kalendáriu tuir mai depois de reultadu final husi prova oral nian.

Formuláriu aplikasaun no dokumentu sira suporte nian entrega direta husi kandidatu ba Unidade de Parcerias e Cooperação (UPC) Ministério do Ensino Superior, Ciência e Cultura, Avenida Marginal No. Colmera, Vera Cruz-Dili, Timor Leste

“Dokumentos aplikasaun ne’ebe submete ona maibe LA KOMPLETU sei la konsidera ka DISKUALIFIKA!!!”

Mak nee deit, Ba ita boot sira nia atensaun ami hato’o, obrigadu wain

Dokumentu Bolsa Estudu; ( https://mescc.gov.tl/wp-content/uploads/2025/04/Bolsa-Estudu-Universidade-Kuala-Lumpur-Malasia.pdf )