by Díli, 30/12/2024: S. Exa. Ministru Ensinu Superiór, Siénsia no Kultura, Dr. José Honório, partisipa Serimónia Graduasaun Instituto Superior Cristal (ISC) ba Dala XVI, ne’ebé mak realiza iha Salaun Sentru Konvensaun Díli, ho Total graduadus ne’ebé mak gradua hamutuk nain 982, ne’ebé kompostu husi Nivel Lisensiatura no Nivel Mestradu.
Portanto, iha Dr. José Honório, iha nia diskursu ofisial hateten katak ´´Governu Timor-Leste liuhusi Ministériu Ensinu Superior, ho nia foku prinsipal 3 ne’ebé objetivu atu hodi hadia kualidade Ensinu Superiór iha Timor-Leste maka, 1. Kapasitasuan no Formasaun ba Professores/Dosente sira, 2. Apoio Estudante sira, no 3. Apoio ba Universidade“, atu hodi bele reforsa liu tan kualidade husi Instituisaun Ensinu Superiór sira iha Territoriu nasional nian. Iha parte seluk mos, ministru afirma ba iha partisipantes sira hotu liga ho situasaun assedu sexual ne’ebé mak mosu iha Universidade no Instituto sira, Ministériu rasik, diskute no aprova ona regras zero toleransia ba assesu sexual ba Instituisaun Ensinu Superiór sira, hodi kombate assedu sexual iha ambiente universitarius sira, hodi nune’e espasu universidade bele sai hanesan fatin seguru atu hodi halao prossesu aprendizagem ba sidadaun hotu.
Iha sesaun ne’e, Ministru mos parabéniza graduadus no mos Instituisaun ensinu superiór ne’e, tambá hakat tan passu ida hodi kontribui ba produz rekursu humanu hodi servi Timor-Leste.
Iha sesaun ne’e, hola parte mos husi Partisipantes sira seluk, hanesan Dr. Edmundo Viegas ne’ebé mak sai hanesan palestrante sientifiku, Diretora Nasional Siénsia no Téknolojia – MESSK, Sra. Amelia Silva, Diretor Ezekutivo ANAAA, Dr. Nilton Paiva, reprezentantes husi Insituisaun Ensinu Superiór sira, reprezentantes husi seguransa, inklui mos prezidente fundaun Cristal no Reitor hamutuk ho Estrutura sira, estudante graduadus ho nia família sira no mos reprezentantes husi Instituisaun relevantes sira.
