June 24, 2024

MESSK Partilla Programa Ministériu Nian iha Diálogu PM ho Autoridade Lokal Munisipiu Covalima

S. Exa. Ministru Ensinu Superiór, Siénsia no Kultura, Longuinhos dos Santos, hamutuk ho membru Governu balun kontinua akompaña S. Exa. Primeiru-Ministru Taur Matan Ruak hala’o diálogu ho Autoridade lokál no Komunitária sira iha Munisipiu Covalima ho tema: “Reforsa Reziliénsia Nasaun Nian”.Iha diálogu ba dala 7, iha Munisipiu Covalima, S. Exa. Ministru Ensinu Superior, Siénsia no Kultura partilla mós programa Ministériu Ensinu Superiór, Siénsia no Kultura nian durante mandatu: “Hau hakarak partilla informasaun liu-liu kona-ba bolsa estudu ne’ebé mak Ministériu Ensinu Superior implementa tiha ona, liuhusi Fundu Dezenvolvimentu Kapital Humanu (FDCH sigla ho portugés), ne’ebé dadus nasionál investimentu rekursu umanu porvolta 6.401 benefisiáriu sira, ne’ebé ita kategoriza kada munisipiu nian. Nune’e iha Munisipiu Covalima mak sai hanesan benifisiáriu husi Governu ba bolsu estudu mak ho totál ema 308”.Aleinde ne’e, informa mós katak VIII Governu Konstitusionál, liu husi Ministériu Ensinu Superiór, Siénsia no Kultura kria mos programa foun ida ho naran bolsa Hakbi’it ba familia Kbi’it Laek. Objetivu husi bolsa estudu ida ne’e fo prioridade liu ba oan sira husi inan no aman ne’ebé mak la iha rendimentu permanente no kapasidade finanseiru adekuadu. Iha tinan 2021, implementa tiha ona bolsa hamutuk 910 ba estudante sira husi instituisaun Ensinu Superiór Públiku no Privadu akreditadu sira.Iha vaga refere ita fó oportunidade asesu ho igualdade ba Munisipiu hotu-hotu, ho nune’e Munisipiu Covalima simu bolsa Hakbi’it hamutuk ba ema nain 35, fahe ba feto 22 no mane 13. Sr Ministru mós salienta katak feto hetan oportunidade barak tanba ita iha lema ida katak “Feto forte Nasaun forte”.S. Exa. Ministru mos informa tan katak iha prosesu ida ne’e, bainhira ita kria bolsa hakbi’it, ita identifika área potensiál ne’ebé mak estudante sira hala’o estudu hanesan Agrikultura, Enjeñaria, Turismu, Saúde no sira seluk tan. Nune’e kuandu sira remata estudu bele hetan servisu no saláriu diak atu fó apoiu ba sira-nia família. Sr. Ministru reforsa katak graduadu sira laos atu sai deit funsionáriu públiku, maibe tenke dezenvolve sira-nia a’an hodi kria kampu servisu hodi fo servisu ba ema seluk.Iha oportunidade ne’e, Sr. Ministru fahe mos informasaun kona-ba benefisiáriu husi apoiu Uma lulik no Grupu Kulturál Komunitáriu sira, iha minisipiu Covalima, hanesan grupu Kaduta, Dansa kulturál lensu mutin husi Suai loro no apoiu konstrusaun ba prezervasaun Uma lulik Bikehi.Diálogu ne’e hala’o iha Aeroportu Internasionál Kay Rala Xanana Gusmão Covalima, no hetan partisipasaun membru Governu, Administradór Munisipiu, Administradór Postu, Xefi Suku, Xefi Aldeia, reprezentante relijiozu, veteranus, grupu juventude no sosiedade sivil.

0Shares