by S. Exa. Ministru Ensinu Superiór, Siénsia no Kultura, Longuinhos dos Santos, hamutuk ho membru Governu balun kontinua akompaña S. Exa. Primeiru-Ministru Taur Matan Ruak hala’o diálogu ikus ho Autoridade Lokál no Komunitária sira iha Munisípiu Aileu ho tema: “Reforsa Reziliénsia Nasaun Nian”.Iha diálogu ne’e, Xefi Suku Seloi Kraik, Gabriel Mendonça, hato’o rekomendasaun ba MESSK ho MOP atu servisu hamutuk hodi loke dalan ba família sira afetadu husi projetu Sidade Universitáriu Aileu, ne’ebé mak simu indeminizasaun, atu lori sira ninia sa-san ba iha bairu foun ne’ebé mak sira muda ba, tanba sira kontribui ona ba dezenvolvimentu nasionál. Hatan ba pergunta ne’e, S. Exa. Ministru Ensinu Superiór, Siénsia no Kultura informa katak halo ona karta ba Sr. Ministru Obras Públikas no ami nain rua mos koordena malu ona atu halo asaun hirak ne’e iha tempu badak, nune’e antes halo lutu ba iha rai refere ita muda uluk komunidade sira ba fatin foun. Prezidenti Asosiasaun Fada, Domingas de Jesus, sujere ba UNTL atu loke Departamentu Arkitetura no Belas Artes. Hatan ba pergunta ne’e S. Exa. Ministru salienta katak kursu refere interesante ne’ebé ba ita-nia rai no ba joven sira nian. Sr. Ministru informa mós katak agora dadaun “hau ho Magnífiku Reitor UNTL halo ona koordenasaun atu kria Fakuldade ida foun ho naran Fakuldade Turismu no Arte Indústria Kriativa Kulturál, no Departamentu ne’ebé Sra. Domingas propoin iha nia okos”. Diálogu ne’e, hala’o iha salaun Timor Klaran, Munisípiu Aileu, no hetan partisipasaun husi membru Governu balun, Administradór Munispiu Aileu, Komandante Munisípiu Aileu, Administradór Postu, Xefi Suku, Xefi Aldeia, reprezentante relijiozu, veteranus, grupu juventude no sosiedade sivil.
