KONFERÉNSIA INTERNASIONÁL “REDE UNIVERSIDADE ASEAN” HO TEMA “KOMPROMISU BA GARANTIA KUALIDADE NO EXELÉNSIA KUALIFIKASAUN IHA TIMOR-LESTE”.

Díli, 18 Marsu 2025: Ministériu Ensinu Superior, Siensia no Kultura (MESSK), liu husi Diresaun Jerál Ensinu Superior no Siensia, servisu hamutuk ho Rede Universidade ASEAN realiza Konferénsia Internasionál ho nia tema prinsipál “Kompromisu ba Garantia Kualidade no Eselénsia Kualifikasaun iha Timor-Leste” ba Intituisaun Ensinu Superior Públiku no Privadu sira iha salaun Delta Nova.

Iha loron hanesan, S.E. Ministru Ensinu Superior, Dr. José Honório akompaña direita Primeiru-Ministru (PM), Dr. Kay Rala Xanana Gusmão hodi halo Abertura ba Konferénsia Internasionál ne’e. Iha nia Intervensaun, Primeiro-Ministro (PM) hakarak atu programa no kualifikasaun Intituisaun Ensinu Superior Timor-Leste tenke iha akreditasaun diak liu no hetan rekoñesimentu iha nivél nasionál no internasionál hodi bele hasa’e kualidade rekursu umanu iha rai-laran iha futuru mai. Primeiru-Ministru mos hato’o nia agradesimentu ba Ministériu Ensinu Superior, Siensia no Kultura (MESSK) ne’ebé iha inisiativa hodi bele kondúz no prepara ona prosesu konsultasaun hamutuk ho Rede Universidade ASEAN atu realiza Konferénsia ne’e.

Ambitu ba realizasaun Konferénsia Internasionál ne’e mak atu proporsiona plataforma ba diskusaun polítika dezenvolvimentu Ensinu Superior iha ASEAN, atu reforsa rede kooperasaun ba Universidade sira iha ASEAN, atu promove kolaborasaun programa ensinu no investigasaun ka peskiza ne’ebé Rede Universidade ASEAN identifika sai prioridade liu, no atu promove kooperasaun no solidaridade liu husi akadémiku no investigadór sira ba membru estadu ASEAN.

Iha oportunidade hanesan, Intituisaun Ensinu Superior Públiku no Privadu sira mos hetan aprezentasaun husi Ekipa Rede Universidade ASEAN hodi indrodus kona-ba kontextu Rede Universidade ASEAN, misaun, kapasitasaun Instituisaun Ensinu Superior no dezenvolvimentu programa, garante kualidade rede universidade ASEAN, personaliza estudu ho rekursu iha téknologia, responsabilidade sosiál no sustentabilidade iha universidade, rede universidade ba direitu umanu, rede ba defisiénsia no polítika públiku.

Seisaun ikus ensera ho Workshop ne’ebé lidera husi Rede Universidade ASEAN hodi halo diskusaun no troka ideia hamutuk ho Intituisaun Ensinu Públiku no Privadu relasiona ho kualifikasaun ensinu no dezenvolvimentu qualidade sistema universidade iha Timor-leste.

#Media_URP_MESSK