Dili-08-01-2025: Komisaun G Parlamentu Nasionál, kompostu husi Vise-Prezidente Komisaun G, Deputadu Gabriel Soares, no nia membru sira, hanesan Deputadu Mateus da Cruz, Deputada Sancha Margarida Tilman no Deputadu Firmino Taequi akompaña direta husi S. Exa. Ministru Ensinu Superiór, Siénsia no Kultura, Dr. José Honório, hala’o fiskalizasaun ba edifísiu Ministériu nian, iha Colmera – Díli.
Iha okaziaun ne’e, S. Exa. Ministru konvida Distintu Deputadu sira husi Komisaun G hodi observa direta kondisaun real Diresaun sira hotu ne’ebé integra Ministériu Ensinu Superiór, Siénsia no Kultura.
Durante vizita ne’e, S. Exa. Ministru informa katak kondisaun edifísiu Cobby House, ne’ebé Ministériu uza, ladún diak tanba edifísiu refere hari’i tiha ona durante tinan 20 resin. Tamba ne’e, Sr. Ministru informa katak iha posibilidade uza orsamentu iha Fundu Infrastrutura hodi halo reabilitasaun ba edifísiu ne’e.
Aleinde ida-ne’e, S. Exa. Ministru José Honório informa mos kona-ba kestaun númeru funsionáriu permanente ne’ebé limitadu liu no katak iha tinan 2024, Ministériu halo koordenasaun ho Komisaun Funsaun Públika hodi halo ajustamentu funsionáriu kazuál sira ba Ajente Administrasaun Públika (AAP).
Iha tempu hanesan, S. Exa. Ministru konvida Distintu Deputadu sira husi Komisaun G Parlamentu Nasionál hodi observa direta prosesu koreksaun pontus izame kandidatura ba Asesu Ensinu Superior (UNTL-IPB)ba tinan akadémiku 2025. Sr. Ministru salienta katak prosesu ne’e hala’o ho máximu transparénsia no rigor, tuir regra ne’ebé iha, no jere husi Prezidente Komisaun Asesu Ensinu Superior (KAES), Sra. Filomena Lay Guterres, ho nia ekipa.
