by 
Díli, 09/12/2024: Ekipa tékniku husi Diresaun Nasional Ensinu Superior, kontinua realiza atividade exame, teste meritu ba kandidatu F-FDTL sira ne’ebé mak hakarak atu kontinua sira nia estudu iha Instituisaun Ensinu Superior Publiku Timor-Leste nian, ba tinan akademiku 2025, tuir rejime espesial, sub rejime F-FDTL, ne’ebé mak fo oportunidade extraordinária ba forsa armada Timor-Leste sira, atu hetan espasu iha Instituisaun Ensinu Superior Publiku.
Realizasaun atividade ne’e, ho Kooperasauns servisu hamutuk ho Instituisaun Falintil-Forsa Defesa Timor-Leste (F-FDTL), ne’ebé mak defini ona tuir Diploma Ministérial No.º 54/2024, 25 Jullu, ne’ebé mak prossede kona-ba prossesu implementasaun atividade assesu ensinu superior Publiku (UNTL no IPB) ba tinan akademiku 2025 nian. Ba rejime ida ne’e rasik, defini ona iha Diploma Ministérial refere, tuir rejime espesial, sub rejime F-FDTL, ne’ebé mak vaga ba sub rejime ida ne’e, destina direta kandidatu sira ne’ebé mak selesiona direta husi Instituisaun forsa armada refere.
Total kandidatus sira ne’ebé mak partisipa iha exame refere, ho numero total hamutuk nain 88, ne’ebé mai husi kuadrus ofisiais no kuadrus permanentes F-FDTL nian. Atividade ezame refere realiza ba kandidatu sira tuir kada area hanesan, area Siénsia no Teknolojia, Siénsia Sosiais Humana no Tékniku Vokasional nian.
Portanto, antes ne’e, ekipa Komisaun Assesu Ensinu Superiór (CAES – Sigla Portugés), mos realiza ona exame ba rejime espesial no sub-rejime sira seluk, iha Munisipiu sira hotu iha territoiu nasional nian. No ba rejime Jeral rasik, estudante finalista Ensinu Sekundariu sira sei halo prienximentu ba boletim, hafoin anusia rezultadu final ba Ezame nasional ensinu sekundariu tinan 2024 nian.
