by 
Likisa, 29/10/2024: Ekipa monitorizador ba Fundu Subvensaun Publika CUIS, lideradu husi Diretor Jeral Planeamentu no Finansas – MESSK, Sr. Hernâni Viterbo da Costa Soares, halo monitorizasaun ba ezekusaun fundu subvensaun Publika ne’ebé mak governu liu husi Ministériu Ensinu Superior, Siénsia no Kultura, atribui ba iha Instituisaun Ensinu Superior Privadu sira iha Timor-Leste, ne’ebé iha atividade ida ne’e, destinadu visita ba iha ISJB no UNPAZ iha Munisipiu Likisa.
Objetivu husi atividade ida ne’e, atu monitoriza progressu ezekusaun fundus ne’ebé mak Ministériu transfere ona ba iha Instituisaun no Universidade sira tuir necessidade sira ne’ebé mak defini ona iha kontratu ne’ebé selebra entre kada instituisaun ensinu superior sira ho Ministériu. Iha visita ida ne’e, ekipa atu halo observasaun no supervisaun infraestruturas sira ne’ebé mak Instituisaun Ensinu Superior 2 refere, implementa ho fundos ne’ebé mak sira hetan.
Portanto governo Timor-Leste liuhusi Ministériu Ensinu Superior, Siénsia no Kultura rasik, aloka ona osan ho montante 5 Milloes ba subvensaun publika, hodi atribui apoio ba iha Instituisaun Ensinu Superior privadu sira, atu hodi bele ajuda reforsa nesessidade sira ne’ebé mak Instituisaun no Universidade sira iha. Ho nia metodu de atribuisaun tuir faze, ne’ebé faze dahuluk Ministériu sei atribui uluk 40% liuhusi meius transferência ba konta bankaria Instituisaun sira nian, wainhira Instituisaun sira ezekuta no submete ona relatório ezekusaun faze dahuluk nian maka, sei kontinua transfere fila fali montante resto 60% hodi kompleta orsamentu total ne’ebé mak defini tuir kontratu.
