Ekipa husi Ministériu Ensinu Superiór Siénsia no Kultura, halo distribuisaun materiál ba funsionariu sira MESSK nian iha Munisípiu

Ekipa husi Departamentu Administrasaun, Lojístika no Patrimóniu, Ministériu Ensinu Superiór Siénsia no Kultura, liuhosi Diretór Nasionál Finansas, Administrasaun, Lojístika no Patrimóniu, Sr. Droaldo F. Morais, rasik maka halo distribuisaun sasán ba funsionariu sira MESSK ne’ebé mak destaka iha munisípiu Bobonaru.

Programa ida-ne’e,  hala’o ona mós iha munisípiu sira seluk hanesan Ainaru no Kovalima ne’ebé mak dirije rasik husi xefe departamentu Administrasaun Lojístika no Patrimóniu ho nia ekipa.

Objetivu husi programa ne’e atu distribui materiál, bazeia ba Item tolu (3) hanesan, Item 660 (Materiál Eskritóriu), Item 670 (Materiál Operasionál) no Item 650 (Konbustível dólar 30), ba funsionariu sira MESSK iha munisípiu sira.

Tuir xefe departamentu Administrasaun, Lojístika no Patrimóniu, Sr. Paulo Mariano, implementa programa ida-ne’e, bazeia ba relatóriumonitorizasaun ho fiskalizasaun husi Gabinete Inspesaun nian no mós informasaun husi Diresaun Nasionál Rekursu Umanu, hodi hatán ba preokupasaun ne’ebé mak funsionáriu sira hasoru iha munisípiu.

Xefe mos salienta katak durante ne’e funsionáriu sira identifika falta materiál eskritóriu, materiál operasionál no kombustível, liuliu manutensaun ba ekipamentu operasionál no motorizada sira. Tan ne’e, ho materiál hirak-ne’ebé mak simu ona, bele fasilita no hakmaan liután funsionáriu sira-nia servisu iha baze.  Ba manutensaun motorizada sira, daudaun ne’e, funsionáriu sira bele halo manutensaun iha kompañia ne’ebé mak MESSK rasik hili tiha ona.

Tuir planu kona-ba programa distribuisaun ne’e, sei kontinua iha munisípiu sira seluk ne’ebé mak funsionariu sira MESSK nian destaka ba.