Diretóra-Jerál Ensinu Superior no Siénsia simu Delegasaun husi Indonésia

Diretora-Jerál Ensinu Superior no Siénsia, reprezenta Sua Exa Ministru Ensinu Superiór, Siénsia no Kultura, simu Delegasaun Indonesia lidera husi Sra. Juliana Bahar, Diretóra ba Kooperasaun Asuntus ASEAN Sósio Kulturál nian ho nia ekipa iha Resintu Ministériu Ensinu Superiór, Siénsia no Kultura iha Colmera, Dili.

Sorumutuk ne’e hala’o ho objetivu mak halo identifikasaun ba nesesidade iha área kapasitasaun rekursus humanus relasiona ho aplikasaun Timor-Leste nian hodi tama iha ASEAN, liu-liu iha pilar kooperasaun Sósio-Kulturál nian, tamba iha tinan 2023 Indonesia mak sei lidera ASEAN.

Sorumutuk ne’e hetan partisipasaun máximu husi Dirijente MESKK nian nomos Ajénsia Autónomu tutela ba MESKK nian, hanesan Komisaun Nasionál UNESCO Timor-Leste, ANAAA, Diretor-Jerál Administrasaun no Finansas no sira seluk tan.

Delegasaun ne’e akompaña husi Diretór husi MNEC ba Asuntu Komunidade ASEAN Sósio-Kulturál nian, Pedro Laranjeira. Iha mos aprezentasaun husi parte Ajénsia Nasionál ba Avaliasaun no Akreditasaun Akadémika (ANAAA) iha parte esforsu Timor-Leste nian atu kumpri ASEAN Quality Standard Framework ensinu superior nian nomos aprezentasaun kona-ba Investimentu iha formasaun Rekursu Humanu kualifikadu husi Fundu Dezenvolvimentu Kapitál Humanu nian.