by S. Exa. Ministru Ensinu Superiór, Siénsia no Kultura, Longuinhos dos Santos, hamutuk ho membru Governu balun, akompaña S. Exa. Primeiru-Ministru Taur Matan Ruak hala’o diálogu ho Autoridade lokál no Komunitária sira iha Munisipiu Láutem ho tema: “Reforsa Reziliénsia Nasaun Nian”. Partisipante sira iha diálogu ne’e (veteranus no jerasaun patriota munisípiu Láutem) hato’o pergunta pertinenti balun ligadu ba kompeténsia husi Ministériu Ensinu Superior no Kultura, liu-liu kona-ba familia sira ne’ebé mak la iha ona forsa atu haruka oan sira ba eskola iha Universidade no prosesu apoiu Uma Lulik. S. Exa. Ministru Ensinu Superior, Siénsia no Kultura hatan katak Politika VIII Governu estabelese ona programa ida foun (hari’i iha 2021) ho naran Bolsa Hakbi’it, ne’ebé mak hari’i iha tinan 2020 maibe lakonsege ezekuta tamba kauza husi xumba OJE 2020 – no Estadu moris ho duodésimu – no mós problema seluk hanesan Covid-19.Informa mós katak iha tinan 2021 Ministériu, liu husi FDCH, konsege rekruta ona sidadaun benefisiáriu sira ba Bolsa Hakbi’it hamutuk ema 910, ne’ebé mai husi munisipiu sira hotu (inklui RAEOA) hodi promove igualidade ba oportunidade atu asesu iha vaga refere. Iha tinan 2022, aprova ona orsamentu atu rekruta tam benefisiáriu hamutuk 1000 ne’ebé mak atu tama iha Instituisaun Ensinu Superior públiku (UNTL no IPB) no privadu akreditadu sira. Relasiona ho prosesu apoiu Uma Lulik, Sr. Ministru informa katak ita fó apoiu iha kategoria 3 mak hanesan: konstrusaun, rehabilitasaun no inaugurasaun. Maibé pedidu proposta tenki inisiativa mai husi Uma Lisan nia na’in sira no submete ba MESCC, liu husi SEAK. Diálogu ne’e hala’o iha salaun Sentru Konvensaun Lautem, no hetan partisipasaun husi Membru Governu, Administradór Munisípiu, Administradór Postu, Xefi Suku, Xefi Aldeia, reprezentante relijiozu, veteranus, grupu juventude no sosiedade sivil.
