by 
Aileu, 17/09/2024: Ekipa husi Komisaun Assesu Ensinu Superiór (CAES – Sigla Portugués), Ministériu Ensinu Superiór, Siénsia no Kultura, realiza atividade dezeminsaun ba ´´Assesu Ingressu ba Instituisaun Ensinu Superiór Públiku (UNTL & IPB) 2025“ nian, ne’ebé mak realiza iha Salaun Instituto Superiór Cristal (ISC) Polo Aileu.
Objetivu husi atividade ida ne’e, atu halo dezeminasaun kona-ba prosedimentus no rekezitus sira ne’ebé mak nessesita atu hodi assesu ba iha Instituisaun Ensinu Superiór Públiku UNTL no IPB nian, ba iha autoridade lokal sira, diretores eskola sekundaria sira, veteranos no mos instituisaun relevantes sira iha Munisipiu Aileu nian.
Iha sesaun abertura refere representante husi Edukasaun Munisipiu Aileu, Sr. Miguel Moniz, afirma katak ´´husu representante sira ne’ebé mak prezente iha sorumutu ida ne’e, atu bele rona didiak no habelar informasuan ba iha sosiedade sira, atu bele eleva numeru partisipasaun Aileu oan hodi assesu ba oportunidade iha Instituisaun Publiku rua (2) refere“.
Aleinde ne’e, Diretor Nasional Legalizasaun (DNL-MESSK), Sr. Sergio de Deus, afirma iha nia breves palavras ba abertura nian, ´´husu atu autoridade lokal sira bele toma atensaun no tamba autoridade lokal sira mak sei emite karta deklarasaun ba iha kandidatu sira ne’ebé mak atu assesu liuhusi sub rejime hakbi’it nian, atu hodi bele fo oportunidade ba iha kandidatu sira ne’ebé mak ho kondisaun ekonomikamente desfavorável atu bele kontinua sira nia estudu iha Instituisaun Ensinu Superiór Publiku nian“.
Atividade refere, hanesan atividade ordinariu anual nian husi MESSK, hodi bele garantia transparansia no asessibilidade ba iha publiku hotu iha território nasional nian. Ho nune’e iha tinan ida ne’e base-ia ba diploma Ministérial N.º54/2024, 25 Jullu, ´´Assesu ba Ensinu Superiór Públiku Tinan 2025“, ne’ebé mak fo kompetensia ba iha KAES hodi prosede prossesu rekrutamentu estudante foun sira ne’ebé atu assesu ba instituisaun ensinu superór publiku (UNTL no IPB), liuhusi rejime rua (2), Rejime Jeral ho Sub rejime 2 no Rejime Espesial ho sub rejime hamutuk 16.
Portanto, sesaun dezeminasuan iha munispiu Aileu ne’e, aprezenta husi Diretor Nasional Legalizasaun (DNL), Sr. Sergio de Deus, hamutuk ho tékniku sira husi MESSK, UNTL no IPB. No hetan partisipasaun husi, reprezentante Prezidente Munisipiu Aileu, Autoridade Lokal ho nia reprezentantes sira, Diretor Eskola sira no mos Instituisaun relevantes sira.
