by 
Kuala Lumpur, 02/11/2024: S. Exa. Ministru Ensinu Superiór, Siénsia no Kultura, Dr. José Honório, akompañadu husi asesores no ténikus husi Ministériu MESCC, hala’o sorumutu ho homólogu Malázia nia, ne’ebé lideradu husi S. Exa. Ministru Ensinu Superior, Dato’ Seri Diraja Dr. Zambry Abd Kadir, ho nia ekipa iha Kuala Lumpur, Malázia.
Durante sorumutu refere, halo ho objetivu hodi diskute kompromisu ne’ebé atu implementa Memorandu de Entendimento (MoU) ida iha setor Ensinu Superior nian ba tinan 2025. MoU refere sei fó énfase ba kooperasaun no servisu hamutuk hanesan kapasitasaun rekursu umanu, atribuisaun bolsa estudu, promosaun mobilidade estudante, no programas sira ne’ebé relasiona ho dezenvolvimentu kurrikular no sistema kualifikasaun nian.
Kooperasaun ne’ebé sei implementa bele kontribui ba dezenvolvimentu setor Ensinu Superior no meljoramentu ba rekursu umanu Timor-Leste nian. Lian especial, sei fó prioridade ba assuntu hanesan kualidade kurrikular no implementasaun sistema kualifikasaun, hodi defini no produz rekursu umanu ne’ebé kualifikadu ho kualidade diak ba nível nasional, no mos bele alkansa metas internasional hodi fó asesu ba merkadu internasional, lian especial ba merkadu iha ASEAN nian.
Durante sorumutu refere, S. Exa. Ministru Ensinu Superiór, Siénsia no Kultura, hatete nia apresiasaun no admirasaun ba sistema Ensinu Superior Malázia nian, ne’ebé organizado ho diak no sai hanesan referénsia ba país estranjeiru sira seluk. S. Exa. Ministru Malázia nia, Dato’ Seri Diraja Dr. Zambry Abd Kadir, mos afirma Malázia nia komitmentu atu kontinua fó apoio ba Timor-Leste, liu-liu iha setor Ensinu Superior nian. Ministru Malázia mos sublinha nia prioridade atu reforsa kualidade Ensinu Superior iha nível ASEAN nian, alinhadu ho Malázia nia prezidénsia iha ASEAN ba tinan 2025.
Tuír plano ne’ebé existe, Instituisaun Governu rua sei selebra akordu ofisiál ne’ebé agenda ona ba fulan Janeiru tinan 2025 mai. Iha sorumutu refere, partisipa téknikus no dirijentes husi Ministru Ensinu Superiór Malázia nian no MESCC nian.
