𝗠𝗘𝗦𝗦𝗞 𝗽𝗿𝗲𝘇𝗶𝗱𝗶 𝘀𝗼𝗿𝘂𝗺𝘂𝘁𝘂𝗸 𝗞𝗼𝗻𝘀𝗲𝗹𝗹𝘂 𝗥𝗲𝗶𝘁𝗼́𝗿 𝘀𝗶𝗿𝗮 𝗯𝗮 𝗱𝗮𝗹𝗮-𝗶𝗸𝘂𝘀

S. Exa. Ministru Ensinu Superiór, Siénsia no Kultura (MESSK), Longuinhos dos Santos, prezidi sorumutuk Konsellu Reitór sira ba dala-ikus, ne’ebé hala’o iha Hotel Novo Turismo, Lecidere-Díli.

Ajenda sorumutuk ida-ne’e iha objetivu prinsipál rua, mak hanesan tuir mai ne’e: i) Avaliasaun ka balansu final kona-ba funsionamentu Konsellu Reitór sira (periudu 2020 to’o 2023) no (ii) lansamentu livru husi S.Exa. Ministru ho títulu “Intervensaun sira, Harii Kualidade Ensinu Superiór iha Timor-Leste”.

Atu salienta mós katak, Magnífiku Reitór no Prezidente husi Insttituisaun Ensinu Superior públika no privada sira apresia ho pozitivu tebes kona-ba kriasaun Ministériu espesífiku ida hodi akompaña área ensinu superior no mós medida balun ne’ebé implementa ona durante mandatu husi VIII Governu Konstitusionál. Reitor sira mós fo sira nia hanoin kona-ba importánsia husi kriasaun no funsionamentu Konsellu Reitor nian hanesan órgaun konsultivu ne’ebé atu rona sujestaun ka preokupasaun husi Instituisaun hotu hodi bele buka solusaun hamutuk.

Sorumutuk ida-ne’e hetan partisipasaun máximu hosi Magnífiku Reitór sira, Prezidente INCT, Diretór Ezekutivu ANAAA, Diretora-Jerál Ensinu Superiór no Siénsia, tékniku no asesór sira Ministériu nian.