𝐌𝐈𝐍𝐈𝐒𝐓𝐑𝐔 𝐄𝐍𝐒𝐈𝐍𝐔 𝐒𝐔𝐏𝐄𝐑𝐈Ó𝐑 𝐋𝐈𝐃𝐄𝐑𝐀 𝐑𝐄𝐔𝐍𝐈𝐀𝐔𝐍 𝐊𝐎𝐍𝐒𝐄𝐋𝐋𝐔 𝐑𝐄𝐈𝐓𝐎𝐑𝐄𝐒

𝐃𝐈𝐋𝐈, 𝟏𝟖 𝐀𝐠𝐨𝐬𝐭𝐮 𝟐𝟎𝟐𝟑 – S. E. Ministru Ensinu Superiór, Siénsia no Kultura, 𝐃𝐫. 𝐉𝐨𝐬é 𝐇𝐨𝐧ó𝐫𝐢𝐨 𝐝𝐚 𝐂𝐨𝐬𝐭𝐚 𝐏𝐞𝐫𝐞𝐢𝐫𝐚 𝐉𝐞𝐫ó𝐧𝐢𝐦𝐨, Sesta ne’e, lidera Reuniaun Konsellu Reitores Dahuluk iha nia mandatu ho Reitór no Prezidente sira hosi Instituisaun Ensinu Superior Públiku no Privadu iha Timor-Leste.

Iha Reuniaun, ne’ebé hala’o iha otél Novu Turizmu – Lesidere, diskute kona-ba programa IX Governu Konstitusionál liuliu atu Kria Komisaun Koordenadora ida ba Universidade no Institutu Superiór sira , hodi estuda estratéjia koletiva ida hodi define asisténsia ida ne’ebé di’ak liu hosi parte Estadu nian no hodi implementa objetivu ba hasa’e kualidade Ensinu Superior.

Iha sorumutuk ida-ne’e, mós Ministru Ensinu Superiór, Siénsia no Kultura halo lansamentu ba Sistema Jestaun Dadus Ensinu Superior Timor Leste (SGDES-TL, sigla portugés), ho objetivu atu bele integra dadus hotu husi Dosente, Estudante no Graduadu sira husi Instituisaun Ensinu Superior sira hotu iha Timor-Leste.Partisipa iha reuniaun ne’e, Reitor ka representante sira husi Instituisaun Ensinu Superior nian, no mós estrutura MESSK nian kompostu husi Xefe Gabinete, Diretór Jerál no Asesor sira.