by Betano, 05/03/2024: Ekipa téknika Diresaun-Jerál Planeamentu no Finansas hosi Ministériu Ensinu Superiór, Siénsia no Kultura (MESSK), kompostu hosi Enjeñeiru no tékniku sira, hamutuk ho ekipa téknika sira hosi Ajénsia Dezenvolvimentu Nasionál (ADN) no hosi Ministériu Obras Públika (MOP), halo análize ba estrada foun alternativa ne’ebé sei uza hodi fasilita prosesu konstrusaun edifísiu IPB foun iha faze tuirmai.
Objetivu hosi análize ne’e atu identifika dalan alternativa foun sira-ne’ebé bele troka dalan prinsipál mak daudaun ne’e uza hela. Estrada foun ne’e bele uza ba sirkulasaun karreta boot hirak-ne’ebé tula naha todan hodi harii edifísiu foun, nune’e bele evita atu estrada prinsipál sira sai aat fali.
Daudauk ne’e, konstrusaun faze dahuluk (landscape) projetu nian IPB la’o hela, no, tuir planu, faze konstrusaun sira seluk nomós infraestrutura balu tan tan sei hahú iha tempu badak.
