𝐀𝐒𝐄𝐀𝐍 𝐈𝐌𝐌𝐄𝐑𝐒𝐈𝐎𝐍 𝐓𝐄𝐀𝐌 𝐒𝐓𝐔𝐃𝐘 𝐕𝐈𝐒𝐈𝐓 𝐓𝐎 𝐓𝐇𝐀𝐈𝐋𝐀𝐍𝐃

Tekniku husi Unidade Relasaun Publika, Ministériu Ensinu Supérior, Siénsia no Kultura, Sr. Julio Guterres, partisipa iha atividade ASEAN Immersion Team Study Visit husi programa Futuro Lider ba ASEAN (FLBA), ne’ebé mak organiza husi Vice-Ministro Assuntu ASEAN, Ministériu Negósius Estranjeiru no Kooperasaun Timor-Leste nian, durante loron 10 nia laran, hahu husi loron 18 to’o 28 Maiu 2024, iha país Thailandia.

Objetivu husi programa refere atu hodi kapasita jovens sira atu kompriende kona ba ASEAN liu husi visita estudu ba país membru ASEAN sira ho nia fokús prinsipal iha area aselerator espesífiku 3 hanesan: Human Development, Economic Growth no Sustainability.

Alénde ne’e, objetivu prinsipal seluk husi programa refere maka, atu prepara futuru líder ba ASEAN, ne’ebé mak bele iha abilidade no koñesimentu di’ak kona ba ASEAN, atu kontribui ba Timor-Leste nia pozisaun no integrasaun ba ASEAN iha futuru, liu-liu ba Timor-Leste nia preparasaun atu adere ba sai pleno membru ASEAN nian.

Atividade ne’ebé maka kombina iha programa visita estudu ida ne’e maka, kompostu husi, Workshop, reuniaun no Site visit, ba fatin estratéjiku sira hanesan Instituisaun no Espasu Publiku/Privadu sira ne’ebé maka ligadu ho area aselerator 3 ne’ebé indika iha leten.

Partisipantes ne’ebé hola parte iha ekipa refere kompostu husi setor Publiku no privado sira hanesan, Care Internasional, Plan Internasional, SEFOPE, Universitáriu, no Emprendedores sira.