Malázia, 12-14 Maiu 2026: Ministério Ensinu Superiór, Siensia no Kultura (MESSK) liuhosi Diretór-Jerál ba Ensinu Superiór no Siénsia, Sr. Domingos Barros, akompaña hosi Prezidente Institutu Politékniku Timor-Leste no reprezentante sira hosi setór privadu Timor-Leste, partisipa iha semináriu internasionál “Closing the Gap Workshop 2026”, ho tema “Anchoring Workforce Readiness Collaboration and Partnership”, ne’ebé realiza iha Penang, Malázia.
Eventu ida-ne’e organiza hosi Ministériu Ensinu Superiór Malázia ho apoiu hosi programa EU-ASEAN Sustainable Connectivity Package – Higher Education (SCOPE-HE).
Objetivu prinsipál hosi programa ida-ne’e mak atu hametin kooperasaun entre instituisaun ensinu superiór sira no sentru formasaun téknika-profisionál (TVET), liuhosi promove fortalese kapasidade institusionál no transferénsia koñesimentu akadémiku no tékniku. Inisiativa ida-ne’e mós hakarak prepara di’ak liután estudante no graduadu sira, liuhosi kombina koñesimentu akadémiku ho kompeténsia prática no profisionál, atu nune’e bele fasilita hetan sertifikasaun profisionál no aumenta oportunidade atu tama iha merkadu servisu.
…………………………
